Rosalía de Castro, a "literata"

rdecastro by anonymous

Probablemente a maioría de vós coñeza á, quizais, autora máis afamada das nosas letras. Mais, ademais das obras que puidéramos ler e analizar nas materias de Lingua e literatura galega (Cantares gallegos, Follas novas) ou de Lingua e literatura castelá (En las orillas del Sar), Rosalía escribiu tamén un interesante documento sobre a muller escritora: Las literatas. Carta a Eduarda. 

"Las literatas. Carta a Eduarda" é un artigo escrito en 1865 e publicado en Lugo dentro do Almanaque de Galicia para uso de la juventud elegante y de buen tono. O texto é un ensaio en forma de carta ficticia escrita baixo o nome de Nicanora e dirixida a Eduarda. Rosalía publica unha nota ao final da carta explicando que a atopou nun maletín mentres paseaba pola cidade e decidiu publicala. Este se trata, probablemente dun recurso de distanciamento ante a polémica que puidera xerar a defensa da muller escritora, a "literata". Escolle o xénero epistolar, para aumentar o realismo e por ser un medio idóneo para a exposición e o debate de coñecementos entre mulleres acomodadas.

Mais adiante, analizaremos na aula un texto irmán de Virginia Woolf, Un cuarto de seu, onde volveremos sobre algunha das cuestións que formulaba Rosalía.